Leloaren azalpena:

2009ko Oinezen mezua gure leloak biltzen du: TXIKIAK HANDI.

Andra Mari ikastola txikia da. Ikastola osatzen duten herriak ere txikiak dira. Gure herrialdea (Euskal Herria) txikia da. Eta nola ez, gure hizkuntza, euskara, hizkuntza gutxitua da.

Baina txikiak izanda ere sendoak gara, indartsuak, eta etorkizun handikoak. Gure ikastolak, esate baterako, 40 urte bete ditu, eta 3. Oinez du hurrengoa. Oinarri sendoak dituen ikastetxea gara, beraz, eta gure proiektuak sustrai zabalak ditu. Txikiak handi da gure leloa. Txikiak kopuruetan eta bitartekoetan, baina handiak ilusioetan eta asmoetan.


Eta horixe izango da gure Oinez: txiki indartsuen bozeramaile. Bere txikitasunean handiak diren horien ordezkari. Eta kontzeptu hau hizkuntz minoritario eta minorizatuei lotua gauzatuko dugu. Gizarte globalizatu honetan handiek besterik ez dute tokia (ingelesa, gaztelania, txinera…). Baina, guk hizkuntza txikien aldarria eginen dugu mundu zabalean. Txikiak izanda ere indartsuak garelako, eta 4 haizetara hedatu nahi dugulako gure izana. Oraingoan Europako hizkuntza txikien enbaxadore izanen gara: asturiarra, katalana, galegoa, aragoiera bretoia, sardoa, okzitanoa, gaskoia, galesa, gaelikoa…

Mezua edo filosofia hau ikastoletako festen esparruan berritzailea dela iruditzen zaigu. 4 hamarkada daramagu euskara aldarrikatzen gure buruari begira. Bada garaia salto kualitatibo bat emateko. Gure Oinez hau “nazioarteko” bihurtuko dugu. Hau da, nazio eta herrialde txikien sarera kokatuko dugu gure burua., txiki askoren loturak indarra ematen du eta.

Eta hau guztia gauzatzeko harremanetan gaude Europako hizkuntza txikietako ordezkariekin, hainbat proiektu bultzatuko dugu.

Logoaren azalpena:

2009ko Nafarroa Oinezek protagonista paregabea dauka: ARGIÑE ipurtargia: gure maskota xarmangarria. Eragin.com enpresako Martin Etxauri · Txo?! marrazkilariak diseinatua da. Ipurtargia aukeratu dugu gure mezu eta proiektuaren sinbolo gisa, besteak beste, bertakoa delako, atsegina, jatorra, maitagarria eta berezia delako. Atsegin zaigu, eta xamurtasuna eragiten digu.

Beste alde batetik, ipurtargia bat dator Oinez 2009ko mezu orokorrarekin: Txikiak Handi. Txikia da, baina berezko argia du basoko iluntasunean. Ikastola bezala intsektu horrekin identifikatzen gara, haren txikitasunean indarra, ilusioa eta argitasuna irudikatzen baitu. Guk bezala, ez du ezeren beharrik nabarmentzeko eta distiratzeko handi eta indartsutzat jotzen ditugunen aurrean. Denok ezagutzen ditugu ipuinak edo istorioak, non ipurtargia azkenean irabazle suertatzen den edo erregina bezala bukatzen den bera baino handiagoak diren basoko animalien (sugearen, otsoaren, eta abarren) aurrean. Eta halaxe da beti bidea erakusten dion argi bat daukalako.

Ipurtargiak, gainera, oso ongi adierazten du Oinez 2009an landu behar den gai nagusia: HIZKUNTZA GUTXITUAK. Ipurtargiaren 2000 espezie inguru sailkatu omen dira, gutxi gorabehera, hau da, munduan dauden hizkuntza gutxituen kopuru berdina. Hizkuntza horiek ipurtargi txikiak dira, hizkuntza-globalizazioaren iluntasunean berezko argitasunez distira egiten dutenak, itzali  nahi diguten argitasuna. Aurre egiten diete gaueko neonen inbasioari eta argiaren kutsadurari, denak berdin izatea nahi duen horri, inork berezko distira izatea nahi ez duen horri.

Argiñe maskota: logotipo bat baino gehiago

Argiñe ipurtargia, 2009ko maskota zoragarria da. Dirdiratsu eta alaia da; bizi-bizia, hitzontzia eta maitagarria. Gauza asko dakizki, eta han eta hemen ibiltzen da istorioak kontatzen. Lagun handiak ditu ikastoletan, eta ikastoletatik kanpo. Asko gustatzen zaizkio hizkuntzak. Izan ere, badaki hizkuntza askotan Kaixo neska-mutilok! esaten. Eta gehien gustatzen zaizkionak hizkuntza txikiak dira, euskara bezalakoak. Jakina! Bera ere txiki da eta!

Argiñe ipurtargi kume emea da. Eta gainontzeko ipurtargiek bezala argi bat dauka atzeko aldean. Beraz, bere handitasuna horretan datza: argi horri esker urrutitik ikusten zaio, eta nahi duenari bidea argitzen dio atzetik joateko.

Toki askotan ikusiko dugu Argiñe maskota, Oinez jaialdiari lotutako jardueretan, bazterrak alaitzen, eta gure mezua zabaltzen.